ސަރުކާރުން ލާމަށް ދޯކާއެއް - ކެންސަރު ހޮސްޕިޓަލް ކެންސަލްކުރުމުން ނުރުހުން

ފެށިފައިވާ އެއްވެސް ޕްރޮޖެކްޓެއް ނުހުއްޓާނެކަމުގެ ވަޢުދާއެކު އައި ސަރުކާރުން ގަމުގެ ކެންސަރު ހޮސްޕިޓަލް މަޝްރޫޢު ކެންސަލްކޮށްލިކަން އިއުލާންކުރުމާއެކު ލާމުން ނުުރުހުން ފާޅުކުރަމުން އެބަދެއެވެ. 

ލ.ގަމުގައި ކެންސަރު ހޮސްޕިޓަލް އެޅުމުގެ މަޝްރޫޢަކީ އިންޑިޔާގެ އެގްޒިމް ބޭންކުން ލޯނު ނަގައިގެން ހެދުމަށް ކުރީ ސަރުކާރުން އިޢުލާންކޮށްފައިވާ ޕްރޮޖެކްޓެކެވެ. ކެންސަރު ހޮސްޕިޓަލްގެ ހުވަފެން ދައްކައިގެން އެމް.ޑީ.ޕީން ވަނީ އެކި އެކި އިންތިޚާބުތައް ކާމިޔާބުކޮށްފައެވެ. ޢަމަލީ އެއްވެސް މަސައްކަތެއް ނުކޮށް މިދިޔަ ޖުލައި މަހުގެ ނިޔަލަށް މިމަޝްރޫޢަށް ވަނީ 2 މިލިޔަނަށްވުރެ ގިނައިން ޚަރަދުކޮށްފައެވެ. 

އިންތިޚާބަށްފަހު މި މަޝްރޫޢު އަލުން ފަށައިގެން ކޮޅެއްގައި ޖައްސާނެ ކަމުގެ އުންމީދުގައި މުޅި ލާމުގެ ރައްޔިތުން ތިއްބާ، ރައީސް ޑރ.މުޙައްމަދު މުޢިއްޒުގެ ސަރުކާރުން ކުއްލިގޮތަކަށް ކެންސަރު ހޮސްޕިޓަލް ގަމުގައި ނާޅަން ނިންމި ނިންމުމާއެކު ހައްދުންމަތީގެ އެކި ބޭފުޅުން ދަނީ އެކަމާމެދު ނުރުހުން ފާޅުކުރަމުންނެވެ. އެގޮތުން ހައްދުންމަތީ އަތޮޅު ކައުންސިލްގެ ރައީސް ވަނީ އެކަން އެހެން ވެގެން ނުވާނެކަމަށް މީސްމީޑިއާގައި ފާޅުކޮށްފައެވެ. ހައްދުންމަތީ ގަމު ކައުންސިލުންވަނީ އެކަން ކުށްވެރިކޮށް ބަޔާނެއް ނެރެފައެވެ. ރައްޔިތުންގެ މަޖިލީހުގެ ގަމުދާއިރާގެ މެމްބަރުވެސް ވަނީ އެކަން ކުށްވެރިކޮށް ބަޔާނެއް ނެރެފައެވެ. 

ގަމު ކައުންސިލުންނާއި ގަމު ދާއިރާގެ މަޖިލިސް މެމްބަރު މިމައްސަލައިގައި ނުރުހުން ފާޅުކޮށް ބޮޑެތި ބަޔާންތައް ނެރެމުންދިޔަ ކަމުގައިވީނަމަވެސް ގިނަ ބަޔަކު ޤަބޫލުކުރާ ގޮތުގައި  ކެންސަރު ހޮސްޕިޓަލު ވުޖޫދަށް ނައީ އެފަރާތްތަކާއި ކުރީ ސަރުކާރުގެ ވަރަށް ބޮޑު އިހުމާލުންނެވެ.