މާވަށު "ކިލާގަނޑު" ސާފުކުރަން ފަށައިފި

މާވަށު ކައުންސިލާއި އަންހެނުން ތަރައްޤީއަށް މަސައްކަތްކުރާ ކޮމެޓީ ގުޅިގެން މާވަށު ކުޅި ނުވަތަ"ކިލާގަނޑު" އިހު އޮތްގޮތަށް އިޢާދަކުރުމަށްޓަކައި އެސަރަޙައްދު ސާފުކުރުމުގެ މަސައްކަތްކުރަން ފަށައިފިއެވެ. އެގޮތުން ރަށުގެ އެންމެންގުޅިގެން މާވަށު ކުޅި ނުވަތަ"ކިލާގަނޑު" އިހު އޮތްގޮތަށް އިޢާދަކުރުމުގެ މަސައްކަތް ފެށުމުގެ ގޮތުން މިއަދު ހެނދުނު 6 ޖެހިއިރު ފެށި މަސައްކަތުގައި ރަށުގެ މުއައްސަސާތަކާއި ވިޔަފާރިތަކާއި ޖަމިއްޔާ ޖަމާޢަތްތަކާއި ރަށުގެ ރައްޔިތުން ބައިވެރިވެފައިވެއެވެ. 
ކުޅި ސާފުކުރުމަށް ކުރަމުންދާ މަސައްކަތުގެ ތެރެއިން ކުރިޔަށްދާ ފުރަތަމަ ހަރަކާތުގައި ރާވައިފައިއޮތީ، އެސަރަޙައްދު ވަކިކުރުމަށް ކައުންސިލުން ޖަހާފައިވާ ފެންސުގެ އެތެރޭގައި ހުރި ހުރިހާ ކުނިބުންޏެއް ނަގާ ސާފުކުރުމަށެވެ.  މީގެ އިތުރުން މި ސަރަހައްދުގައިވާ ކިލާގަނޑާ ނުގުޅޭ ބާވަތްބާވަތުގެ ވިނަ އާއި ގަސްތައް ނެގުމުގެ މަސައްކަތްވެސް މިއަދު ކުރެވުނެވެ.

 

މާވަށު ކުޅި ނުވަތަ"ކިލާގަނޑު" އިހު އޮތްގޮތަށް އިޢާދަކޮށް ހިތްފަސޭހަ ސަރަޙައްދެއްގެ ގޮތުގައި ތަރައްޤީކުރުމަކީ ރަށުގެ ކައުންސިލާއި ޒުވާނުންގެވެސް ވަރަށް ބޮޑު އުންމީދެކެވެ.