ލުޠުފީ މިނިވަންވެއްޖެ

ބަޑިބުރާސްފަތީގެ މޭސްތިރި 19 ދިވެހީންގެ ޤާޠިލު ހ.ހާޖަރާގޭ ޢަބުދުﷲ ލުޠުފީ މިނިވަން ވެއްޖެއެވެ.

އޭނާ މިއަދު މިނިވަންވީ ކުރީގެ ރައީސް މުޙައްމަދު ނަޝީދުގެ ސަރުކާރުން އޭނާ ބޭސްފަރުވާކުރުމަށް ލަންކާއަށް ފޮނުވުމުން ފިލައިގެން 9 އަހަރު ހޭދަކުރި މައްސަލައިގައި އޭނާގެ މައްޗަށް އިއްވި ޖަލު ޙުކުމް ތަންފީޒުކޮށް ނިމުމުންނެވެ. ނޮވެންބަރު 3 ގެ މައްސަލައިގައި އޭނާއަށް މަރުގެ ޙުކުމް އިއްވި ނަމަވެސް ކުރީގެ ރައީސް އަލްއުސްތާޛު މައުމޫން ޢަބުދުލްޤައްޔޫމްވަނީ އޭނާގެ ޙުކުމް އުމުރު ދުވަހުގެ ޖަލުޙުކުމަކަށް (25 އަހަރަށް) ލުއިކޮށްދެއްވާފައެވެ. އޭނާ ފިލިއިރު ޖަލު ޙުކުމުގެ ބާކީ އޮތީ 4 އަހަރެއްހައި ދުވަހެވެ. ފިލައިގެން ނުދިޔަނަމަ 2014 ވަނަ އަހަރު އޭނާ މިނިވަންވީހެވެ. 

ލުޠުފީ ފިލި މައްސަލައިގެ ޙުކުމް ތަންފީޒުކުރަން ފެށީ މިއަހަރުގެ އޭޕްރީލް 25 ވަނަ ދުވަހުއެވެ. 

ލުތުފީ އިސްވެ ހުރެ ވެރިކަން ވައްޓާލަން ދިން ނޮވެންބަރު 3 ގެ އުދުވާނީ ހަމަލާގައި 8 ސިފައިންނާއި އާންމުންގެ 11 މީހަކު ޝަހީދުވިއެވެ. މި ހާދިސާއަށް 35 އަހަރު ފުރުނުއިރުވެސް ޢާންމު ދިވެހީންގެ ހިތުގައި އެދުވަހުގެ ބިރުވެރިކަން އިއްޔެ ވީކަމެއްހެން އައުވެ އައުވޭވެ އެބަހުއްޓެވެ.