މަޖިލީސް 20: ޢަބްދުއްރަޙީމް ފޮނަދޫ ދާއިރާއަށް ވާދަކުރައްވަނީ

Majilis 20: Abdur Raheem Fonadhoo dhaairaa ah vaadhakurah'vanee

މިދިޔަ ރިޔާސީ އިންތިޚާބުގެ ކެމްޕޭން ޖަލްސާއެއްގައި ޢަބްދުއްރަޙީމް ވާހަކަފުޅު ދައްކަވަނީ. ފޮޓޯ: ޕީޕީއެމް

11 ޑިސެންބަރު 2023

އަންނަ އަހަރު ބާއްވާ ރައްޔިތުންގެ މަޖިލީހުގެ އިންތިޚާބުގައިި ވާދަކުރެއްވުމަށް, ޕީޕަލްސް ނެޝަނަލް ކޮންގްރެސް (ޕީއެންސީ) ގެ ޗެއާޕާސަން އަދި ރައީސުލްޖުމްހޫރިއްޔާގެ ޚާއްސަ މުޝީރު ޢަބްދުއްރަޙީމް ޢަބްދުﷲ (އަދުރޭ) ނިންމަވައިފިއެވެ.

މީސްމީޑިއާގެ ބައެއް މަންސަތަކުގައި ޢަބްދުއްރަޙީމް މިއަދު ކުރެއްވި ޕޯސްޓެއްގައި ހާމަކުރައްވާފައިވާ ގޮތުން އޭނާ ވާދަކުރައްވަން ނިންމަވާފައިވަނީ ލ.ފޮނަދޫ ދާއިރާއަށެވެ.

ޢަބްދުއްރަޙީމަކީ ފޮނަދުއަށް އުފަން ބޭފުޅެކެވެ. އެ ދާއިރާގައި ހިމެނެނީ ފޮނަދުއާއި މާމެންދުއެވެ.

''2024 ވަނަ އަހަރު ބޭއްވުމަށް ހަމަ ޖެހިފައިވާ 20 ވަނަ ރައްޔިތުންގެ މަޖިލީހުގެ ލ.ފޮނަދޫ ދާއިރާއަށް ވާދަކުރުމަށް އަޅުގަނޑު ނިންމައިފީމެވެ. ދާއިރާގެ ލޮބުވެތި ރައްޔިތުންގެ ތާއީދު އަޅުގަނޑަށް ދެއްވުމަށް ނުހަނު އިޚްލާސްތެރިކަމާާއެކު އެދެމެވެ.'' މީގެކުރިން މަޖިލީހުގައި ފޮނަދޫ ދާއިރާ ތަމްސީލު ކުރެއްވި ޢަބްދުއްރަޙީމްގެ ޕޯސްޓުގައި ލިޔުއްވާފައިވެއެވެ.

18 ވަނަ މަޖިލިސް އިންތިޚާބުގައި ފޮނަދޫ ދާއިރާ ތަމްސީލު ކުރެއްވި ޢަބްދުއްރަޙީމް ވަނީ 19 ވަނަ މަޖިލިސް އިންތިޚާބުގައި ވެސް ވާދަކުރައްވައިފައެވެ. ނަމަވެސް މިހާރު އެ ދާއިރާ ތަމްސީލު ކުރައްވަނީ އެމްޑީޕީގެ ޓިކެޓުގައި ވާދަކުރައްވައި އިންތިޚާބު ކާމިޔާބު ކުރެއްވި މޫސާ ސިރާޖެވެ.

''ލާމުން'' ނޫހަށް މައުލޫމާތު ލިބިފައިިވާ ގޮތުން ޕީއެންސީގެ މެމްބަރެއްގެ ގޮތުގައި މިހާރު ހުންނެވި ސިރާޖު މިފަހަރު ފޮނަދޫ ދާއިރާއަށް ވާދަނުކުރައްވާނެއެވެ.

ފޮނަދޫ ދާއިރާއަށް ވާދަކުރައްވާނެކަން މިހާތަނަށް އިއުލާނުކުރައްވާފައިވަނީ ޢަބްދުއްރަޙީމް އެކަންޏެވެ.

މަޖިލިސް އިންތިޚާބުގައި ޕީޕީއެމް-ޕީއެންސީގެ ޓިކެޓުގައި ވާދަކުރައްވާނެ ބޭފުޅުން ކަނޑައެޅުމަށް ބާއްވާ ޕްރައިމަރީ އިންތިޚާބު އޮންނާނީ ޑިސެމްބަރު 23 ވަނަ ދުވަހުގައެވެ.