ތުނޑީ ފުޓްސަލް ޗެލެންޖުގެ ފައިނަލްމެޗް މާދަމާރޭ

ތުނޑީ ފުޓްސަލް ޗެލެންޖުގެ ފައިނަލް މެޗް މާދަމާރޭ (ހުކުރުވިލޭރޭ) 9 ޖަހާއިރު އޮންނާނެއެވެ. މިމުބާރާތުގެ ފައިނަލްގައި ބައްދަލުކުރާނީ ސްޕާކް ޕްލަގާއި ފޮއެމަތި ސްޕޯޓްސް ކުލަބެވެ. ސްޕާކްޕްލަގަކީ ގަމު ތުނޑީ އަވަށަށް ނިސްބަތްވާ ޒުވާނުންގެ ޓީމެކެވެ. ފޮއެމަތި ސްޕޯޓްސް ކްލަބަކީ ގަމު މަތިމަރަދޫ އަވަށަށް ނިސްބަތްވާ ޒުވާނުންގެ ޓީމެކެވެ. 

 

ހައްދުންމަތީގައި ހުނަރުވެރި ފުޓްސަލް ކުޅުންތެރިން އުފެއްދުމުގެ މަގުޞަދުގައި ލ.ގަމު ތުނޑީ ޒުވާނުން އިސްނަގައިގެން ކޮންމެ އަހަރަކުވެސް ބާއްވަމުން ގެންދާ ތުނޑީ ފުޓްސަލް ޗެލެންޖް 2023ގެ މެޗްތައް އޮންނަނީ ވިލާކޮލެޖު ގަމު ކެމްޕަސް ކުރިމަތީގައި އޮންނަ ތުނޑީ ފުޓްސަލް ދަނޑުގައެވެ.

ފުޓްސަލްގެ ރޮނގުން މުޅި ރާއްޖޭގައި އެންމެ ނަންވިދާ ކުދީން ތިބީ ހައްދުންމަތީގައެވެ. އެހެންކަމުން ލ.އަތޮޅުގެ ހުރިހާ ރަށަކުން ބައިވެރިވުމުގެ ފުރުޞަތު ހުޅުވާލައިގެން، ކުރިއަށް ގެންދާ މި މުބާރާތުގައި ކޮންމެ ރަށަކުން ބައިވެރިވާ ޓީމުތަކުގައި ހިމެނެނީވެސް ހަމައެކަނި އެރަށަކަށް ނިސްބަތްވާ ކުޅުންތެރިންނެވެ. މި މުބާރާތުގައި ޖުމްލަ 15 ޓީމު ބައިވެރިވެފައިވެއެވެ. އޭގެތެރޭގައި ކަލައިދޫ، މާބައިދޫ، ހިތަދޫ، ފޮނަދޫ އަދި ގަމުގެ އެކި އަވަށްތަކަށް ނިސްބަތްވާ ޓީމުތައް ހިމެނެއެވެ.